Pilar Otero, actual directora de administración da empresa Frigorífico Rosa dos Ventos, foi nomeada nova presidenta da Asociación Nacional de Mulleres da Pesca (Anmupesca) durante a asemblea extraordinaria celebrada este sábado en Santiago de Compostela. A elección marca o inicio dun novo mandato de catro anos, no que Otero tomará o relevo da anterior presidenta, Rita da Igrexa, cuxo período á fronte da entidade remataba neste 2024.
A nova xunta directiva, que acompañará a Otero na dirección da asociación, estará composta por María Jesús Otero na vicepresidencia, María Anxos Cayuela como secretaria, Luisa Seco como tesoureira e varias vogais territoriais: María Sonia López por Galicia, Remedios Ruso pola Comunidade Valenciana, Inmaculada Carrasco por Andalucía e Soidade Alonso por Cantabria.
Anmupesca, constituída no ano 2016, agrupa máis de vinte asociacións vinculadas ao sector pesqueiro feminino de todo o Estado. A entidade traballa en ámbitos como a defensa dos dereitos das mulleres da pesca, o análise do seu papel na cadea mar-industria e o impulso do empoderamento e recoñecemento profesional das traballadoras.
A nova presidenta galega asume o cargo nun contexto de cambios e retos para o sector, con especial atención á situación das mariscadoras, rederas, percebeiras e outras profesionais que desenvolven a súa actividade tanto no litoral como en ámbitos da transformación e comercialización.
Desde Anmupesca, sinalan que esta nova etapa pretende fortalecer a visibilidade das mulleres no mar e incidir na igualdade de oportunidades, ao tempo que se busca incrementar a representatividade da entidade en espazos de decisión e nas políticas públicas do sector pesqueiro.
