A conselleira de Política Social, Fabiola García, visitou este sábado a exposición ‘Outras historias posibles‘, que pode verse no Museo Centro Gaiás da Cidade da Cultura ata finais de xaneiro de 2025. A mostra reúne as obras de seis artistas nadas na década dos 50 e con vínculos a Galicia: Ana García Pan, Emilia Guimeráns, Anne Heyvaert, Tusi Sandoval, Branca Silva e Laura Terré.
O obxectivo da exposición é pór en valor a creación artística protagonizada por mulleres, ofrecendo máis visibilidade ao seu traballo. A mostra inclúe unha variada selección de pinturas, esculturas, xilografías, catálogos e revistas, acompañadas de entrevistas en vídeo e audio onde as propias artistas comparten as súas historias e perspectivas.
Fabiola García destacou a importancia de promover iniciativas culturais que visibilicen o papel das mulleres na arte, contribuíndo a enriquecer o panorama artístico galego e internacional.
