Máis de 400 persoas participaron este sábado no desfile de ‘entroidos’ tradicionais que cada ano organiza a Xunta durante o verán como incentivo para que os visitantes coñezan os recursos galegos e volvan a Galicia durante o inverno para participar destas festividades. O director de Turismo de Galicia, Xosé Merelles, asistiu á saída desde a Prazado Obradoiro, en Santiago de Compostela, e animou a que visitantes e turistas volvan durante o inverno “para coñecer recursos que nos fan únicos como destino, como son os nosos entroidos tradicionais”.
“Esta é unha maneira que nos está dando resultados á hora de desestacionalizar o noso turismo, para que veñan no inverno e queden en Galicia durante varios días que dura o entroido”, dixo o director de Turismo de Galicia. Esta acción impulsada e promovida por Turismo de Galicia, lembrou Merelles, vén desenvolvendo nos últimos anos e está a ter “unha importante resposta” tanto á hora de dar a coñecer esta celebración como no índice de asistentes a estas citas, que se celebran en pleno inverno e “que están a ver como cada ano se incrementa o interese”.
Xosé Merelles lembrou que Galicia está a avanzar en desestacionalización, con importantes incrementos de demanda turística fóra de tempada alta. No que se refire ao Camiño de Santiago, explicou que este ano, en xaneiro e febreiro, incrementouse o número de Compostelas un 10 % e un 6 %; e no que se refire a a actividade turística habitual, este ano tamén destacou o positivo comportamento de meses como febreiro, no que a demanda hoteleira creceu case un 4 %, ou maio, onde os establecementos rexistraron un incremento dun 14 %.
Nesta iniciativa participaron representantes de catro entroidos declarados Festa de Interese Turístico (Vilaboa, Verín, Viana do Bolo e Xenerales da Ulla) e outros 10 entroidos convidados dentro dos moitos ‘entroidos’ que enriquecen Galicia. Nesta edición foron os Volantes de Chantada, as Bonitas de Sande (Cartelle), os Vellaróns de Riós, o Entroido de Samede (Paderne), os Galos da Mezquita (A Merca), os Follateiros (Lobios), os Madamitos e Madamitas de Entrimo, os Felos de Esgos, Fulión de Buxán e os Mudados de Ribadetea (Ponteareas).
