A segunda edición do festival Revenidas Miúdo encherá o vindeiro domingo, día 28 de xullo, o Monte do Gozo de Santiago de música para nenos, xogos e espectáculos de maxia e monicreques.
O secretario xeral da Lingua, Valentín García, e o director de Turismo de Galicia, Xosé Merelles, presentaron este luns o evento, nun acto no que destacaron que todos os grupos que conforman o cartel deste ano fan música en galego e “entran dentro” da intervención en política lingüística para “consolidar o uso da lingua nas idades máis temperás”.
Nesta liña, o representante da Consellería de Cultura, Lingua e Xuventude indicou que este festival está incluído na campaña CulturON da Xunta, unha iniciativa posta en marcha para este verán “con máis dunha trintena de actividades diarias para todos os públicos”.
Por outra banda, Xosé Merelles animou ás familias a participar nesta iniciativa, así mesmo, sinalou a importancia que ten o turismo familiar na “estratexia” do goberno galego á hora de “incluír unha oferta para todos os públicos e en conexión coa natureza”. Deste xeito, destacou que o Monte do Gozo consolídase como un “lugar estratéxico” para a celebración deste tipo de eventos.
