A Dirección Xeral de Patrimonio Cultural abriu dilixencias previas sobre a actuación de orquestra Panorama no Obradoiro, o pasado 8 de maio con motivo das festas da Ascensión.
A alcaldesa de Santiago, Goretti Sanmartín, preguntada ao respecto, confirmou que lle chegou a comunicación do departamento dependente da Consellería de Cultura. Neste sentido, sinalou que realizarán os informes pertinentes e enviaranos con “todas as aclaracións e información” que teña o consistorio. A rexedora compostelá subliñou que o uso da praza, “loxicamente, implica que poida haber movemento das pedras. Iso é algo que vén sucedendo nos últimos anos”.
Sanmartín remarcou que a praza acolle todo tipo de actos como, enumerou, tomas de posesión de presidentes da Xunta, ás veces directos de diferentes medios polas xornadas electorais, carreiras organizadas por colectivos cidadáns e, entre outras, afluencia nalgún momento dalgúns coches para servizos determinados.
O goberno municipal “ten claro” que hai que actuar con “toda a prudencia do mundo” e que ante cada caso estudan diferentes cuestións, como poden ser as relacionadas coa tonelaxe, o son e os decibeis, así como do uso da praza. “Entendemos que iso ten que se compatible con dereito ao goce da praza por parte do conxunto da poboación”, esgrimiu.
