O Casino de Santiago revelou os finalistas do seu Premio de Novela Europea nunha rolda de prensa que contou coa presenza do secretario xeral da Lingua, Valentín García. As obras seleccionadas para competir por este premio son A neta, de Bernhard Schlink (Anagrama); Os reis da casa de Delphine de Vigan (Anagrama); Coa man esquerda de Xabier Quiroga (Edicións Xerais); As despedidas de Jacobo Bergareche (Libros do Asteroide); e As singularidades de Jonh Banville (Alfaguara).
Valentín García destacou a importancia deste galardón na promoción da lectura e no fortalecemento do espírito europeísta, apuntando que o premio non só celebra a excelencia literaria, senón que tamén fomenta unha conexión máis profunda entre os cidadáns e a literatura europea.
Segundo o representante da Consellería de Cultura, este premio é especial porque involucra directamente aos cidadáns na selección das súas obras favoritas, non só de Galicia senón tamén do resto do estado e a nivel europeo, convertendo á comunidade en parte decisiva do proceso.
Para promover aínda máis as novelas finalistas e fomentar a participación pública, están previstas diversas actividades de divulgación, incluíndo colaboracións con librarías, comercios, centros socioculturais e bibliotecas públicas xestionadas pola Xunta. Estas actividades buscan achegar os libros ao público e incentivar a súa participación nos clubs de lectura e nos debates programados que comezarán en setembro.
O acto tamén contou coa participación de Ubaldo Rueda, presidente da Asociación Cultural Casino de Santiago; Maribel Martín, Loli Sans e Marian Rei, responsables do Comité de Lectura; e Lupe Rodríguez e Jesús Torres, responsables das bibliotecas José Saramago e Pública Ánxel Casal, que colaboran na promoción da lectura das obras nominadas.
