O goberno municipal de Santiago e a oposición achegaron posturas para celebrar o acto da Alba de Compostela o día 25 de xullo, aínda que “non hai nada pechado”. “De maneira informal, sen chegar a un acordo claro a idea é que habería consenso de que o acto se celebrase o 25 de xullo”, apuntou este venres a alcaldesa de Santiago, Goretti Sanmartín, nunha rolda de prensa posterior á reunión do consello asesor de honras e condecoracións.
Nesa xunta avanzaron na modificación do regulamento de títulos, honras e condecoracións para introducir o acto da Alba de Compostela e o de Mulleres de Compostela do 8 de marzo. Tras a reunión deste venres, ábrese un prazo para que os diferentes grupos políticos fagan algunha proposta ou suxestión de cambio e a previsión é levalo ao pleno de xuño.
REUNIÓN DA COMISIÓN DA XESTIÓN DA AUGA
Noutra orde de asuntos, Sanmartín explicou que a comisión para estudar un cambio na xestión da rede de abastecemento da auga en Santiago reunirase o próximo 10 de xuño. Desta forma, apuntou que o acordo do pleno, deste xoves, foi un “avance moi importante” para poder dar unha “solución” sobre a xestión do ciclo integral da auga.
