Carlangas inaugura este xoves, ás 20.00 horas, unha nova edición de ‘Atardecer no Gaiás’, o ciclo de concertos gratuítos ao aire libre organizados pola Xunta. O exlíder e vocalista de Novidades Carminha chega a Santiago para presentar o seu terceiro traballo en solitario, Universo Paralelo, un disco no que destacan a colaboración con artistas como Leiva e Dear Joanne.
A actuación, que ía ser ás 21.00 horas, adiántase ás 20.00 horas por decisión do propio Carlangas para non coincidir co partido da selección española de fútbol no Mundial. O acceso ao concerto é libre e gratuíto e poderá utilizarse a liña 9 do autobús urbano para subir e baixar á Cidade da Cultura. O venres, o escenario da praza central do Gaiás será para Marrit, un mozo vigués de 26 anos que obtivo o primeiro premio na categoría de música do certame Xuventude Crea.
