A 45ª Feira do Libro de Santiago de Compostela arrancou este sábado cunha xornada inaugural marcada pola reivindicación da escritora Begoña Caamaño, figura central das Letras Galegas 2026, e pola defensa da lectura en galego como ferramenta cultural e social. O pregón correu a cargo da mestra e dinamizadora cultural Mercedes Teixeiro, nun acto no que tamén participaron a alcaldesa compostelá, Goretti Sanmartín, representantes da Xunta e da Deputación da Coruña.
A edición deste ano, que permanecerá aberta ata o 10 de maio, contará con máis de 60 actividades e unha vintena de casetas de librarías, consolidando a Alameda compostelá como un dos principais espazos de encontro arredor do libro en Galicia. Entre as autoras e autores participantes figuran nomes como Marilar Aleixandre, Arantza Portabales ou Nerea Pallares.
Durante a apertura, Goretti Sanmartín destacou a vinculación de Begoña Caamaño con Compostela e sinalou a relevancia que tivo a cidade na súa traxectoria persoal e literaria. A rexedora lembrou ademais o simbolismo de celebrar esta homenaxe no mesmo espazo no que a autora presentara en 2012 a súa obra Morgana en Esmelle. Na súa intervención, insistiu na necesidade de fortalecer a presenza de referentes femininos na literatura galega, citando figuras como María Xosé Queizán e Xohana Torres, e defendeu a importancia de fomentar a lectura en lingua galega desde a infancia.
Nesa liña, puxo en valor iniciativas locais como a desenvolvida polo CEIP Pío XII, na que crianzas elaboraron agasallos vinculados á lectura para o comercio tradicional compostelán, incluídas librarías, como exemplo de promoción lectora e conexión co tecido social da cidade.
Pola súa banda, o director xeral de Cultura, Anxo M. Lorenzo, definiu a feira compostelá como unha das referencias do circuíto galego de feiras do libro, integrado por 13 citas en toda Galicia e impulsado pola Federación de Librarías co apoio institucional. Tamén o presidente da Deputación da Coruña, Valentín González Formoso, incidiu no valor da lectura como “acto de liberdade” e destacou o papel das librarías de proximidade como espazos culturais e económicos de referencia.
Tras o acto inaugural, a alcaldesa compartiu as súas compras nesta edición, cun total de sete títulos que abranguen narrativa, poesía e literatura infantil: O pazo das marismas, de Alberto Branco Casal; Aprendede dos lirios, de Iain Crichton; La fosa abierta, de Brigitte Vasallo; Tea rooms, de Luisa Carnés; Novas adiviñas para meniños e meniñas, de Nones Araújo; Millennialismo ou sátira dunha xeración, de Ramón Romeu Nogueira; e Apropiación indebida. Una novela sobre el amor, de Lena Anderson.
