A empresa TK Elevator foi distinguida como Mellor Proxecto do Ano 2026 na categoría ‘Elevadores, Nova Construción’ pola revista internacional Elevator World, nun recoñecemento que pon o foco na súa intervención na estación intermodal de Santiago de Compostela.
Segundo trasladou a compañía nun comunicado, o xurado valorou especialmente a transformación desta infraestrutura ferroviaria e de transporte como “referente de accesibilidade, seguridade e confort”, grazas ás solucións de mobilidade vertical implementadas no proxecto.
A actuación abrangueu todo o proceso, desde a fase inicial de deseño ata a execución final, incorporando sistemas orientados a garantir a accesibilidade universal. Estas solucións permiten facilitar o tránsito diario de milleiros de persoas, incluíndo usuarios con distintas necesidades de mobilidade.
A estación intermodal compostelá constitúe, segundo a empresa, un dos elementos destacados na renovación do sistema de transporte urbano e interurbano en España. Ademais da súa función como nodo que conecta tren de alta velocidade, autobuses, taxis e zonas de estacionamento, o espazo foi concibido como unha infraestrutura integrada na cidade e aberta á cidadanía.
No ámbito técnico, o proxecto inclúe a instalación de seis ascensores, tres deles panorámicos, deseñados e fabricados no Estado. Estes equipos distribúense entre plataformas, vestíbulo principal e áreas de servizo, formando parte visible da propia arquitectura do edificio.
Desde TK Elevator subliñan que este galardón reforza a súa posición como empresa especializada en solucións de mobilidade accesible, ao tempo que evidencia a súa capacidade para desenvolver proxectos con proxección internacional a partir de recursos e coñecemento locais.
O CEO da compañía para o sur de Europa e África, Pedro Martín, sinalou que “a estación intermodal de Santiago de Compostela demostra como a mobilidade vertical achega un valor real cando se integra desde o inicio en proxectos complexos”, e engadiu que este recoñecemento tamén destaca a capacidade técnica desenvolvida desde España para competir a nivel global.
