A Xunta de Galicia reforzará o próximo curso a oferta académica da Escola de Arte Superior de Deseño EASD Mestre Mateo de Santiago coa incorporación dunha nova promoción de alumnado da modalidade dual para a itinerario Xoiaría e Complementos.
O conselleiro de Educación, Román Rodríguez, asinou este mércores dous convenios de colaboración co Colexio oficial de Xoiaría de Galicia e coa Asociación de Artesáns e Comerciantes Ourives de Compostela para a nova promoción de alumnado que cursará esta modalidade formativa, que xa comezou a impartirse por primeira vez este curso.
Tal e como lembrou a Xunta, a Escola de Arte e Superior de Deseño Mestre Mateo foi a primeira, e a única de Galicia, en ofertar o itinerario desagregado de Xoiaría e Complementos na especialidade de Produto, cunha “moi boa acollida” por parte do alumnado, xa que se cubriron por completo as 15 prazas ofertadas.
A partir de agora, e grazas aos convenios asinados este mércores, os estudantes matriculados neste itinerario poderán compaxinar a súa formación académica na Escola coa formación práctica en distintas firmas de xoiaría e ourivaría.
Esta formación de carácter dual realizarase de maneira compartida entre as empresas e o centro educativo en 3º e 4º curso, durante os cales os alumnos estarán incorporados ao réxime da Seguridade Social e percibirán o salario correspondente de acordo co marco normativo vixente.
