Case 40 cociñeiros de toda España, que suman máis de 80 Estrelas Michelín, participarán o próximo 10 de xuño no evento gastronómico solidario ‘Estrelas no Camiño de Santiago’, no que os asistentes gozarán dun menú tipo cóctel e de estacións gastronómicas con showcooking con música e animación. A recadación destinarase á Asociación Galega do Síndrome de X Fráxil.
O evento, que celebra a súa décima edición, presentouse este martes na aula gastronómica do compostelán Mercado de Abastos da man do director de Turismo de Galicia, Xosé Merelles; o presidente da Asociación Galega do Síndrome de X Fráxil, Nicolás González Formoso, xunto ao vocal, Iván Simón; e o representante da Delegación Hijos de Rivera en Santiago, Alberto García Pérez. A xornada terá lugar na Leira Casa Barqueiro en Gonte, Negreira, e para asistir deberá adquirirse unha entrada, á venda a partir deste martes, a través de Ataquilla. Para os que non poidan asistir pero desexen colaborar, poden facelo a través da mesa cero cunha doazón ao número de conta É73 2080 0348 3930 4001 2408. Asociación Galega Sindreome X Fraxil-A. G15662505
Na presentación, Merelles destacou o “bo momento” que atravesa este evento que, “ano a ano é capaz de aumentar o número de participantes e consolidarse como unha cita imprescindible para a gastronomía galega”. Destacou que se trata dun proxecto “especialmente importante” para o turismo galego, “xa que aglutina varios dos elementos que definen parte do seu éxito”. A este respecto, lembrou que a gastronomía é a segunda motivación dos turistas para elixir Galicia como destino, polo que é “unha liña de traballo prioritaria”.
Así o demostra, apuntan nun comunicado, a posta en marcha do Plan Territorial de Sustentabilidade Turística Enogastronomía de Galicia, baixo o que se desenvolven distintas estratexias en destino en 80 concellos galegos e levan a cabo liñas de axuda e accións de cohesión para impulsar estes recursos. Ademais, destaca que o evento reivindica outro dos elementos “fundamentais” do modelo turístico galego como é a ruta xacobea, “que está a recuperar a súa internacionalización, xa que no que vai de ano o número de peregrinos estranxeiros que recolleron a Compostela supón o 58 %”. Sinala tamén que, a nivel global, o número de camiñantes aumenta a un ritmo do 21 %.
BOCADO SOLIDARIO E SÍNDROME X FRÁXIL
Pola súa banda, o representante de Hijos de Rivera presentou a novidade da edición da man de Estrella Galicia, o ‘Bocado Solidario’. Entre o 23 e o 26 de maio, os establecementos adheridos á campaña poderán escoller calquera tapa, prato ou menú e acompañalo cunha Estrella Galicia. A consumición deste ‘bocado’ leva unha doazón en favor da causa apoiada polo evento. A edición deste ano reunirá a varios dos mellores chefs de España, “que se unirán para homenaxear a excelencia da gastronomía galega”.
Nesta ocasión, os beneficios volveranse a destinar, por segunda vez, á Asociación Galega Síndrome X Fráxil e como cada ano, está previsto que percorran un tramo do Camiño de Santiago e visiten o Mercado de Abastos e o Monte do Gozo. Entre os participantes están Martín Berasategui, Enejo Atxa, Jesús Sánchez, Helena Arzak, Hermanos Torres, Joan Roca, Toño Pérez, David Muñoz e Paco Roncero. Tamén participarán Pepe Vieira, Javier Oleiros, Manuel Costiña, e Pepe Solla, entre outros.
