O grupo de investigadores que busca en Galicia a vítimas do golpe de 1936 e a consecuente ditadura franquista atopou este luns o que “todo indica” que son os restos dun dos membros dunha agrupación de resistencia ao réxime, inhumados nunha fosa común en Luou, no municipio coruñés de Teo. Tal e como trasladou a Europa Press a responsable das investigacións históricas do grupo Histagra (Historia Agraria e Política do Mundo Rural) da Universidade de Santiago de Compostela (USC), Lucía Santiago, o achado produciuse sobre as 9.00 horas, cando os primeiros indicios dun esqueleto xurdiron na fosa escavada polo equipo de expertos.
“Todo indica que é un deles”, afirmou a historiadora, referíndose a Ricardo Fernández Carlés; Florentino Menéndez Palacios; Manuel Agrasar Cajaraville, o ‘Barbarroxa’; e Vicente López Novo, coñecido como ‘O Fillo da Nova’, integrantes da resistencia antifranquista cuxos corpos serían arroxados á fosa. Precisamente, esta sepultura está emprazada no cemiterio da igrexa de Santa María de Luou, onde segundo a investigación histórica están os catro membros da V Agrupación antifranquista, que foi comandada por Benigno Andrade, coñecido como Foucellas. Segundo Santiago, tras o achado, agora traballan sobre o terreo os arqueólogos do grupo multidisciplinar. A precisa identificación das vítimas, con todo, aínda dependerá de análises forenses.
CONFLITO E MORTE
No informe histórico producido por Histagra a partir de diferentes fontes e relatos conducen a “diversas hipóteses” sobre o que ocorreu durante o enfrontamento que rematou coa morte desas catro persoas. Concretamente, os investigadores informan de que o conflito tivo lugar o 19 de maio de 1948 en Loureiro, parroquia de Luou. Os catro membros do V Agrupación foron abatidos e tamén un garda civil. Foucellas (Benigno Andrade) e Xosé Ramuñán Barreiro lograron fuxir.
