O Festival Cineuropa entregará este martes, 11 de novembro, ás 20:00, no Teatro Principal de Santiago de Compostela, o Premio Cineuropa 2025 ao cineasta palestino Kamal Aljafari, en recoñecemento á súa traxectoria e á súa mirada persoal sobre a memoria, o territorio e o poder político das imaxes.
Segundo informou a organización, a gala de entrega incluirá a proxección do seu último traballo, With Hasan in Gaza, estreado este mesmo ano no Festival de Locarno, unha obra que continúa a liña de reflexión do autor sobre a representación da realidade palestina e a construción da memoria a través da imaxe cinematográfica.
Aljafari é considerado unha das voces máis singulares do cinema contemporáneo, cunha filmografía que transita entre o documental e o ensaio poético, na que investiga as ausencias, os espazos e os fragmentos dun país marcado pola ocupación. O seu cinema, recoñecido internacionalmente, propón unha lectura crítica do poder das imaxes e da súa capacidade para reconstruír ou borrar identidades colectivas.
