Santiago de Compostela convértese esta semana no epicentro do cinema euroárabe coa celebración da XXIII edición do Festival Amal, que se desenvolverá entre o luns e o venres no Teatro Principal. O certame, promovido pola Fundación Araguaney-Ponte de Culturas, adopta nesta ocasión o lema ‘Todas somos Palestina’, como chamada á reflexión sobre o conflito na Franxa de Gaza.
A programación ofrece cinco películas palestinas, entre documentais e ficción, seleccionadas co obxectivo de achegar ao público a vida cotiá, a memoria e a resistencia dun pobo marcado pola guerra e o exilio.
O festival inaugurarase este luns ás 20:00 coa proxección de This is Gaza, de Tom Besley, que relata a historia do cineasta Yousef Hammash, quen perdeu o seu fogar durante os bombardeos. O martes será a quenda de Janin, Jenin, de Mohammed Bakri, unha peza que revisita dúas décadas despois o campo de refuxiados de Jenin, escenario da súa primeira película.
O mércores proxectarase The estafe that remains, do recoñecido realizador Elia Suleiman, unha ficción dividida en catro episodios sobre as distintas xeracións dunha familia palestina desde a creación do Estado de Israel ata a actualidade.
A sesión do xoves 23 estará dedicada ao documental Notes on displacement, de Khaled Jarrar, que segue o periplo dunha muller maior obrigada a desprazarse por segunda vez, desta volta desde Damasco ata Europa a través da ruta dos Balcáns.
O venres 24, o festival pecharase con The Encampments, dirixido por Kei Pritsker e Michael T. Workman, que recolle as protestas estudantís de 2024 en solidariedade co pobo palestino.
