O conselleiro de Sanidade, Antonio Gómez Caamaño, participou hoxe no Multiusos Fontes do Sar de Santiago de Compostela na primeira edición da ‘Xornada de benestar dixital familiar’, unha iniciativa coa que a Xunta pretende impulsar hábitos saudables no uso de dispositivos electrónicos dentro do fogar.
Segundo informou a administración autonómica, a proposta busca axudar ás familias a establecer un equilibrio entre o tempo en liña e o tempo compartido, ademais de orientar sobre contidos educativos e de lecer adecuados para cada idade e definir pautas básicas de conduta dixital.
A programación, que se estenderá ata as 20:00, está pensada para todos os membros da unidade familiar. Entre as actividades, destacou un torneo interxeracional de Mario Kart, no que participaron conxuntamente pais e fillos. Tamén se desenvolveu un obradoiro de recomendacións sobre contidos dixitais segundo as idades e outras sesións que combinaron xogos tradicionais con propostas virtuais.
A maiores, celebrouse un taller sobre tendencias no lecer dixital e retos tecnolóxicos de futuro, xunto con experiencias formativas e dinámicas participativas. A Xunta explicou que a idea é favorecer un ambiente distendido e participativo, no que as familias poidan reflexionar sobre a súa relación co mundo dixital.
