A Semana do Libro de Compostela (SELIC) celebrará unha nova edición entre o 3 e o 12 de outubro, cun programa que combina accesibilidade, cultura de proximidade e propostas para todos os públicos. A presentación oficial contou coa participación da alcaldesa Goretti Sanmartín, que animou veciñanza e visitantes a sumarse á iniciativa.
O festival arrincará de maneira simbólica o domingo 28 de setembro, cunha lectura colectiva no Obradoiro ás 11:30, co obxectivo de “resignificar” este espazo emblemático.
Entre os principais actos destaca a entrega do Premio Selic 2024 á novela Sarela de Marga Tojo, que conversará con Quico Cadaval e Paco Macías o sábado 4 ás 13:00, ademais de asinar exemplares no posto da libraría Numax. Outro nome destacado será o de Bob Pop (Roberto Enríquez), que presentará o seu poemario De corpo presente cun recital o venres 10 ás 19:30.
A accesibilidade será un eixo central da programación. O venres 10 ás 17:00 celebrarase o obradoiro Ler coas mans, introdución ao braille con 25 prazas dispoñibles, e o sábado 11 terá lugar un encontro de clubs de lectura fácil.
Os paseos literarios volven como unha das actividades máis demandadas. Serán catro itinerarios: Doentes (4 e 12 de outubro), 90 anos dos seis poemas galegos de García Lorca (11 de outubro), Faraldo e a revolución de 1846 (6 de outubro) e Wharton e Hemingway por Compostela (10 de outubro).
Na carpa principal da Selic poderase visitar, entre o 3 e o 12 de outubro, a exposición Edito e mando. Como se fai un libre, centrada no proceso de creación dun diario gráfico.
Ademais, a directora artística Lorena Conde anunciou colaboracións con centros escolares, que recibirán materiais específicos como un diario lector e un primeiro abecedario para alumnado de infantil e primeiros cursos de primaria.
