Máis de 2.800 autores membros de asociacións de escritores en galego, eúscaro e catalán estarán representados en Santiago, entre o venres 19 e o sábado 20, durante o ‘Galeusca 2025’, un encontro que abordará, entre outros temas, o impacto da Intelixencia Artificial (IA) nos sistemas literarios a través de diferentes coloquios e actividades.
Detrás do evento están a Asociación de Escritores en Lingua Galega (AELG), a Euskal Idazleen Elkartea (EIE) e a Associació d’Escriptors en Llengua Catalá (AELC), que este venres deron a coñecer o programa a través dunha rolda de prensa. Os seus representantes defenderon ‘Galeusca’ como un “espazo de diálogo” no que queren pór en común perspectivas sobre a creación escrita, enfocado especialmente na IA, entre outros temas da actualidade.
Este ano, o encontro durará dous días, de forma que o sábado 20 concentrará a maioría de encontros e actividades do programa, distribuídas entre o Museo do Pobo Galego e a igrexa de San Domingos de Bonaval. Entre as actividades programadas esta segunda xornada, Rubén Cela, Ania González Castiñeira e Sebastià Portell participarán nun diálogo sobre IA desde as perspectivas das linguas e literaturas minorizadas ás 12.45 horas no Museo do Pobo Galego.
O acto de clausura de ‘Galeusca 2025’ estará a cargo dunha improvisación entre ‘regueifeiras’, ‘bertsolariak’ e ‘glosadors’, ademais dun peche musical con Ugía Pedreira. Por outra banda, na presentación das xornadas estivo presente a alcaldesa de Santiago, Goretti Sanmartín, que considerou un “déficit de certa normalidade democrática” a “falta de coñecemento das linguas e literaturas do Estado fóra do español”.
