O Museo Centro Gaiás da Cidade da Cultura abre este xoves 26 de xuño a mostra ‘Castelao. Mirar por Galicia’, unha ambiciosa proposta tecnolóxica e cultural que recupera a figura de Alfonso Daniel Rodríguez Castelao coincidindo co 75 aniversario do seu falecemento. A exposición insírese na programación do Ano Castelao e propón unha inmersión multimedia sen precedentes arredor da súa traxectoria artística, política e vital.
A exposición busca “traer a Castelao ao século XXI” cun percorrido que mestura rigor histórico e innovación audiovisual. Ademais de exhibir obxectos persoais e debuxos orixinais, a mostra destaca pola incorporación dunha experiencia inmersiva que emprega videoproxeccións en formato cúbico, son cadrafónico e técnicas de animación en 3D para dar vida ás ilustracións do autor rianxeiro. A narración, en primeira persoa, propón unha viaxe emocional e estética pola Galicia que Castelao soñou e retratou, nunha recreación que combina documentación histórica con interpretación artística.
Un dos elementos máis singulares da proposta é a reconstrución da voz de Castelao. Grazas á colaboración entre actores profesionais e tecnoloxías de intelixencia artificial, foi posible recrear un rexistro sonoro do intelectual galeguista a partir do único documento sonoro coñecido: unha fonopostal gravada en 1941 en Buenos Aires, con motivo da estrea de Os vellos non deben de namorarse en Montevideo.
O proxecto contou coa dirección histórica e artística de Miguel Anxo Seixas Seoane, presidente da Fundación Castelao, e foi producido por Maxina, empresa galega especializada en efectos visuais e experiencias inmersivas, dirixida polos irmáns Noela e Carlos Seijo. O estudo desenvolveu os contidos audiovisuais e a tecnoloxía interactiva da exposición, convertendo o espazo do Gaiás nun retrato tridimensional da obra e pensamento de Castelao.
A exposición preséntase como a máis avanzada ata o momento sobre a figura do autor, e supón unha aposta pola difusión do patrimonio cultural galego mediante novos formatos que achegan o legado de Castelao ás xeracións actuais. Permanecerá aberta ao público durante os próximos meses na Cidade da Cultura, en Santiago de Compostela.
