A praza de Mazarelos acolleu este luns a inauguración oficial da 12ª edición de Galicia Escena Pro, o mercado galego das artes escénicas, que se celebra en Santiago de Compostela ata o xoves 5 de xuño. O conselleiro de Cultura, Lingua e Xuventude, José López Campos, deulle a benvida aos máis de 220 profesionais inscritos, así como ao público asistente, xusto antes da actuación inaugural do Colectivo Glovo coa peza de danza contemporánea Trïade.
Organizado pola Xunta de Galicia e a asociación Escena Galega, o evento foi presentado como un “escaparate” para dar visibilidade á calidade e diversidade dos espectáculos escénicos producidos na comunidade. O conselleiro estivo acompañado polo director da Axencia Galega das Industrias Culturais, Jacobo Sutil, e pola presidenta de Escena Galega, Patricia de Lorenzo, quen animaron ao sector a aproveitar tanto as funcións como as actividades paralelas dun programa que cualificaron de “ambicioso”.
A programación inclúe 21 espectáculos de teatro, danza e circo contemporáneo, moitos deles con apoio económico da Xunta, que se exhiben en diferentes espazos da capital galega. Estas funcións, abertas tamén ao público xeral, constitúen o núcleo central dunha feira que persegue favorecer a contratación destas pezas por parte dos programadores presentes.
Nesta edición participan máis de 80 responsables de circuítos, festivais e espazos escénicos, procedentes de toda Galicia, así como de outras sete comunidades autónomas e Portugal. Para facilitar o contacto entre compañías e axentes culturais, a feira acollerá tamén 12 presentacións de proxectos en formato pitching, máis de 500 reunións profesionais, dúas mesas redondas dedicadas aos retos da distribución e da programación, e un concerto do grupo Capital Voskov.
