O músico e compositor compostelán Emilio Cao, integrante do colectivo musical Voces Ceibes, faleceu aos 72 anos. Os Premios Martín Códax da Música compartiron o seu pesar polo falecemento do músico a través da rede social X, cunha publicación na que definiron a Cao como “unha figura crave na apertura da música galega ao ámbito internacional”.
Cómpre lembrar que no 2024 Emilio Cao recibiu o Premio Honorífico Martín Códax da Música, polo que nesta xornada quixeron destacar ao compostelán como “gran referente para todo o sector musical galego”. Pola súa banda, a alcaldesa de Santiago, Goretti Sanmartín, tamén trasladou o pésame pola morte do artista. “Que a terra lle sexa leve! Gran perda para a música galega”, compartiu a través dunha publicación na rede social X.
