Queremos Galego anunciou este xoves en rolda de prensa a convocatoria de manifestación para o 17 de maio, que acabará cunha foliada na Praza do Obradoiro, en Santiago de Compostela. “Será unha homenaxe masiva á lingua e á cultura popular que se mantivo viva na voz das cantareiras resistindo a todos os intentos de apagala”, afirmou a coordinadora da plataforma, Celia Armas.
Así, Queremos Galego fixo un chamamento ás agrupacións, asociacións e colectivos da música galega a participar na gran foliada pola lingua e animou a todas as persoas que participen na manifestación a levar as súas pandeiretas. Ademais, a plataforma sinalou que desenvolverá plenarios por toda Galicia durante as próximas semanas con dous obxectivos: difundir a convocatoria de manifestación e comezar un proceso social “amplo, plural e participativo para facer o que a Xunta non ten disposición de facer”. Este proceso, que se chamará ‘Lingua Vital’, será presentado na Praza do Obradoiro o 17 de maio.
Por todo iso, fronte á “actitude da Xunta e do PP”, subliñou o portavoz de Queremos Galego, Marcos Maceira, haberá unha resposta na mobilización da sociedade “a favor do seu idioma, pero tamén asumindo o protagonismo que se lle nega”. E farao, dixo Maceira, cun proceso “aberto, plural e participativo, para que tanto institucións, administracións como organizacións da sociedade asuman a súa responsabilidade”.
