O Salón Teatro de Santiago de Compostela será o escenario da estrea de ‘Fábrica de fume’, unha proposta de teatro comunitario que explora a relación entre arte e industria a través da historia da fábrica de cerámicas de Sargadelos. A primeira función terá lugar o domingo 16 de marzo ás 12:00 horas, con entrada gratuíta ata completar aforo. O espectáculo repetirase os días 23 e 30 de marzo no mesmo horario.
As creadoras da obra, Celina Fernández Ponche e Ana Fontenla, asinan tanto o guión como a dirección de escena. A peza xorde no marco do proxecto internacional Phone, dedicado ao teatro en linguas minoritarias, e chega agora a Compostela co apoio do Centro Dramático Galego (CDG), financiado pola Consellería de Cultura, Lingua e Xuventude e en colaboración coa Federación Galega de Teatro Afeccionado (Fegatea).
A obra conta coa participación de 18 actores e actrices de diferentes compañías de teatro afeccionado vinculadas a Fegatea. No elenco atópanse Neves Pérez, Juanín Ares, Chus Devesa, Antonio V. Turnes, Pablo Fernández, Lola Roel, Valentín Entrialgo, Edita Álvarez, Guadalupe López, Carmen Lois, Sara Neto, María José Lagoa, Quico Ramilo, Manuel Llilla, Lucía González, María José González, Reyes López e Ana Rosa Pavón.
O vestiario e a caracterización están a cargo do alumnado dos centros de formación Paseo das Pontes (A Coruña) e A Pinguela (Monforte de Lemos), baixo a dirección de Ana Calviño, Rosa Mar Díaz e Luz Freire. O deseño de iluminación foi elaborado por As Dúas e Punto.
UNHA OBRA QUE CONECTA ARTE E CIDADANÍA
No acto de presentación do espectáculo, no que participaron o director xeral de Cultura, Anxo M. Lorenzo, o director da Axencia Galega das Industrias Culturais, Jacobo Sutil, e o director do CDG, Fran Núñez, as autoras destacaron que o proxecto nace tras dous anos de investigación sobre a historia de Sargadelos, combinando traballo artístico e de campo. Segundo explicaron, a súa intención é entender a arte desde o diálogo coa cultura e a sociedade, un principio que guía a súa creación escénica.
As funcións terán lugar no Salón Teatro, sede do Centro Dramático Galego, os domingos 16, 23 e 30 de marzo ás 12:00 horas. A entrada será de balde, con retirada de localidades no portal número 34 da Rúa Nova, que abrirá unha hora antes de cada función.
