O restaurante Simpar, situado no número 47 da Rúa do Vilar, en pleno corazón de Santiago de Compostela, obtivo a súa primeira Estrela Michelin na gala de presentación da guía 2025, celebrada este martes en Murcia. Este recoñecemento convérteo no único restaurante de Galicia que se incorpora á lista nesta edición, consolidando a súa posición no panorama gastronómico estatal.
Os chefs do Simpar, Áxel Smyth e Claudia Merchán, foron eloxiados por Michelín pola súa cociña de inspiración galega, caracterizada por unha técnica innovadora e un enfoque creativo. Segundo destacou a organización, o restaurante aposta por unha filosofía de proximidade: ‘Os seus provedores teñen nomes e apelidos!’, recolleu o comunicado oficial.
Ademais do Simpar, o restaurante O Secadeiro, situado na Serra de Outes, foi recoñecido cunha Estrela Verde, un galardón que premia o compromiso coa sustentabilidade. Os seus chefs, Eva Guzmán e Fernando Rodríguez, destacaron polo uso de ingredientes de proximidade e o cultivo dun horto propio, co que producen gran parte dos vexetais empregados nos seus pratos.
‘Calculamos que o 80% dos produtos cos que traballamos proceden da nosa contorna. Ademais, poñemos especial atención na recuperación de legumes autóctonos, como o Lentellón de Banzas’, explicaron os responsables do restaurante.
