O festival compostelán Son do Camiño sacará á venda este martes, 19 de novembro (a partir das 13.00 horas), os seus primeiros abonos para a edición de 2025, aínda sen que se coñezan que grupos actuarán no evento do Monte do Gozo. Estes chamados Abonos Fieis estarán dispoñibles en distintos tramos de prezo e empezarán en 87 euros (gastos de xestión incluídos). Só se poderá facer a compra a través da web oficial (www.osondocamino.es), xa que non hai ningún outro punto de venda.
Segundo indica a organización, poderanse comprar ata un máximo de seis abonos por compra (non son nominativos). Xa máis adiante activarase a venda das entradas por días (xoves, venres e sábado) da nova edición. Entre outras recomendacións para a compra, o festival explica que non se debe refrescar a páxina unha vez se situou na cola virtual nin saír da mesma para volver entrar, posto que se estará abandonando o proceso e perderase a quenda.
O Son do Camiño informa de que, con base ás últimas actualizacións lexislativas e a lei de espectáculos de Galicia, xa non será necesario acudir con follas de autorización de menores para ser recollidas no control de accesos do evento. Tampouco será necesario e imprescindible que os menores de 16 anos acudan acompañados de adulto responsable. Existirá unha entrada específica de Abono para os tres días de festival a prezo reducido para os menores de nove anos. Green Day, Pet Shop Boys, Mike Towers, J Balvin, Thirty Seconds to Mars e Melendi son algúns dos artistas que pasaron na última edición de 2024 polo Son do Camiño.
