A 38 edición de Cineuropa botará a andar o vindeiro xoves, día 7, e prolongarase ata o 24 de novembro programando máis 130 películas en cinco espazos de Santiago de Compostela, ademais de debates, encontros e concertos, baixo o fío condutor da liberdade e o devir da democracia desde a óptica cinematográfica. A apertura, no Teatro Principal, será coa película francesa ‘Ao grande’, de Emmauel Courcol, estreada na sección oficial do último festival de Cannes e premio do público en San Sebstián.
Como é tradicional, no festival compostelán estarán representados as películas máis destacadas dos circuítos internacional e europeo, con numerosas miradas e procedencias, tendo sempre en conta o nexo coa actualidade e coa “realidade política e social”, como explicou este martes o seu director, José Luís Losa. O festival empápase de estética das eleccións estadounidenses para dar cabida a lecturas sobre a liberdade e a pezas transgresoras, entre as que haberá estreas absolutos.
Na lista de grandes firmas da programación figuran os franceses François Ozon (Quand vient l’automne), Bruno Dumont (L’Empire) ou Quientin Dupieux (Lle deuxieme acte); a británica Andrea Arnold (Bird) e o seu compatriota Mike Leigh (Hard Truths), ademais do italiano Paolo Sorrentino (Parthenope), o portugués Miguel Gomes (Grand Tour) e o norteamericano Paul Schrader (Oh Canada). Entre os títulos que proxectará Cineuropa está o filme xeorxiano April, de Dea Kulumbegashivili, a película iraniana ‘The seed of the sacred fig’, de Mohammad Rassoulof; a cinta anglo-senegalesa ‘Dahomey’, de Mati Diop; a austríaca ‘The Devil’s Bath’, de Verónica Frantz; e ‘Yeohaengjaui pilyo’, o novo encontro de Isabelle Huppert co coreano Hong Sang-Soo.
