O Concello de Ames volveu a colaborar coa asociación Solidariedade Galega co Pobo Saharauí (SOGAPS), sumándose ao chamamento urxente de apoio ante a grave crise humanitaria que afecta os campamentos de refuxiados saharauís. As intensas choivas recentes provocaron derrubes en numerosas infraestruturas, incluíndo vivendas e centros de asistencia comunitaria, forzando a evacuación de máis de 600 familias e deixando practicamente inutilizados centros educativos e médicos.
Segundo informaron desde SOGAPS, a situación nos campamentos é crítica, con case 3.000 persoas afectadas polas inundacións. As organizacións locais, como a Media Lúa Vermella Saharauí e o Ministerio de Cooperación da RASD, solicitaron asistencia urxente para cubrir necesidades básicas como a rehabilitación de infraestruturas, distribución de alimentos, medicamentos e produtos de primeira necesidade, así como o saneamento dos espazos afectados.
SOGAPS está a organizar a compra de material sanitario e anunciou que unha delegación da asociación viaxará aos campamentos o próximo 24 de outubro. Para colaborar, as persoas interesadas poden facer donativos a través da conta bancaria ES48 2080 5056 1130 4006 3331. Para máis información, tamén se pode contactar coa asociación no teléfono 678 727 382.
