O festival de músicas e artes atlánticas Maré pechou a súa quinta edición cun balance “positivo”, nun ano no que logrou reunir en Santiago a máis de 10.000 espectadores cun cartel “diverso e internacional”. Entre os participantes, voces de Alemaña, Angola, Brasil, Estonia, México, Mozambique, Palestina e Portugal, ademais doutras de Cataluña, Valencia ou Galicia.
A organización sinalou nunha nota de prensa que este ano cumpriron os seus obxectivos, como a posta en valor do talento musical “autóctono”, a colaboración entre artistas locais e internacionais ou a consolidación de Compostela como capital “de referencia” para as diversidades musicais atlánticas. Outras das metas eran lograr a integración da programación nas dinámicas sociais e culturais da cidade, así como a participación do activismo social ao apoiar iniciativas en favor do pacifismo o feminismo, a diversidade sexual ou a sustentabilidade.
Neste sentido, a organización fixo fincapé nalgúns exemplos respecto da creación de sinerxías artísticas, como o proxecto conxunto de Sumrrá con Niño de Elche, que “fusiona concepcións e xéneros artísticos distintos”. Mentres que no ámbito do activismo resaltou a participación da Al Ázar, formación que mestura as influencias musicais da palestina Rawan, do boliviano El Zuri e do alemán Tony.
