A concelleira do PP de Santiago Yolanda Otero propuxo a posta en marcha dun programa municipal de atención domiciliaria e de acompañamento á infancia e alegou que a capital de Galicia “debería ser exemplo de cidade preocupada do benestar das familias”.
“Falamos dun recurso que estaría a disposición das unidades familiares con necesidades de conciliación asociadas á organización da vida persoal, familiar e laboral”, explicou.
Otero lembra que unha das funcións dunha Administración local é “dar resposta aos actuais modelos de organización familiar que esixen as necesidades do coidado dos nenos e nenas”, polo que “debe apoiar ás familias compostelás con recursos que favorezan a unha mellor calidade de vida”.
“Desde o PP incidimos na necesidade da creación dun servizo municipal que brinde apoio ás familias no propio domicilio ou fóra do mesmo cando se requira en determinados momentos e situacións, cubrindo horarios nos que hai máis dificultades para atopar servizos que permitan satisfacer a conciliación”, resolveu.
