O conselleiro de Sanidade, Antonio Gómez Caamaño, e a alcaldesa de Teo, Lucía Calvo, asinaron este martes un convenio de colaboración co obxectivo de acometer as reformas e melloras no consultorio dos Tilos. O acordo establece que tanto a Xunta como o Concello cofinanciarán a actuación ao 50%, cunha achega de 8.883 euros cada unha, para un investimento total de 17.767 euros.
Entre as intervencións previstas destaca a mellora do sistema de calefacción, coa substitución da caldeira, radiadores e bomba de circulación. Tamén se realizará a renovación da pintura en varias estancias e optimizarase a iluminación interior do centro sanitario.
Ademais destas obras, a Xunta de Galicia e o Concello de Teo continúan colaborando no proxecto de construción dun novo centro de saúde na Ramallosa, dentro do Plan de Infraestruturas Sanitarias de Atención Primaria. Este novo centro permitirá ampliar os servizos sanitarios no municipio, incluíndo unha área de saúde bucodental. Actualmente, o Concello está en proceso de tramitar a cesión dos terreos necesarios para a súa construción.
