O Concello de Brión, en colaboración co Club Deportivo Brión Hyupersa Santiago, organiza este sábado, 5 de outubro, a XLI Carreira Pedestre Popular da Amaía, unha das citas deportivas máis esperadas da comarca. A proba dará comezo ás 16:30 horas nas inmediacións do parque de Pedrouzos, e xa ten inscritas máis de 180 persoas, aínda que o prazo para anotarse estará aberto ata as 23:59 horas deste mércores, 2 de outubro, a través da páxina web www.carreirasgalegas.com.
A carreira, que forma parte do IX Circuíto de Carreiras da Deputación da Coruña, está supervisada pola Federación Galega de Atletismo e será puntuable, mantendo o control técnico do Comité Galego de Xuíces. A inscrición para adultos ten un custo de 5 euros, mentres que os menores de 16 anos poden participar de forma gratuita.
Nesta edición, a carreira incrementa os seus premios en metálico ata os 2.100 euros, con recompensas para os tres primeiros homes e mulleres na categoría absoluta: 300, 250 e 150 euros, respectivamente. Tamén haberá trofeos deseñados polo recoñecido ceramista Nano Unzueta, así como premios para os tres primeiros clubs federados e os mellores clasificados empadroados en Brión.
O percorrido da proba absoluta consta dun circuíto de 5.000 metros, no que predomina o asfalto (98%) con tramos menores de terra. Pola súa banda, as carreiras para menores celebraranse nas inmediacións do campo de fútbol municipal de Brión. Todas as persoas participantes recibirán agasallos conmemorativos e un avituallamento líquido ao finalizar a proba.
A pasada edición contou con 309 atletas e este ano espérase unha participación similar, consolidando o evento como unha das principais competicións populares da comarca.
