Mañá, 1 de outubro, coincidindo co Día Internacional das Persoas Maiores, a Unión de Xubilados e Pensionistas de UGT-Galicia (UXP) organiza unha concentración ás 12:00 horas na Praza de Praterías, en Santiago de Compostela. A manifestación continuará ata a Praza do Toural, onde se dará lectura a un manifesto no que o colectivo fará públicas as súas demandas.
A principal reivindicación será a defensa do sistema público de pensións, considerado esencial para garantir unha vida digna ás persoas maiores, especialmente nun contexto de envellecemento poboacional. A UXP insta a reforzar o Pacto de Toledo e a implementar medidas como a loita contra a fraude, o aumento dos ingresos do sistema e unha fiscalidade progresiva. Tamén propoñen auditar as contas da Seguridade Social.
Outra das demandas centrais será a loita contra a pobreza e a desigualdade, que afecta de maneira especialmente grave ás persoas maiores. Solicitan o incremento das pensións mínimas e non contributivas, e a posta en marcha de programas de apoio a maiores en situación vulnerable, así como a inclusión financeira e dixital.
En canto á dependencia, a UXP denuncia o chamado “limbo da dependencia” e reclama unha mellora na xestión e financiamento do sistema. Piden reducir os tempos de espera para as valoracións, aumentar o investimento en servizos de atención domiciliaria e centros asistenciais, e mellorar a coordinación entre servizos sociais e sanitarios.
A defensa do sistema público de saúde tamén será un dos puntos claves da protesta. As esixencias inclúen a redución das listas de espera, a mellora da atención primaria, o aumento da atención xeriátrica especializada e o fomento da medicina preventiva e o envellecemento activo.
Finalmente, a UXP demanda unha loita decidida contra o idadismo, fomentando o respecto e a valoración das persoas maiores como activos da sociedade. Instan á creación dunha Lei de dereitos das persoas maiores que garanta a súa autonomía, participación social e o acceso a servizos de saúde e coidados adecuados.
