A concelleira do Partido Popular de Santiago, Olaya Otero, esixe ao goberno municipal, liderado polo BNG, que leve a cabo melloras urxentes na travesía da Estrada, na zona do Restollal, debido ao seu estado de deterioración. Segundo a edil, a veciñanza leva anos demandando solucións para un vial que se atopa en condicións “deplorables”, tanto polo estado do pavimento como pola falta de iluminación.
Otero destacou que o pavimento da rúa foi colocado en boa parte polos propios veciños, utilizando formigón, pero agora presenta numerosas fochancas e irregularidades que poñen en risco tanto a peóns como a vehículos. A situación empeorou nos últimos meses despois de obras nas canalizacións de auga, nas que os buratos abertos no vial quedaron sen asfaltar, facendo que, coas chuvias, os buracos sexan aínda máis profundos.
A falta de iluminación na zona tamén é un motivo de preocupación para os veciños, especialmente nas horas de menor visibilidade durante o outono e o inverno. Otero indicou que a proximidade do IES Lamas de Abade fai desta unha rúa moi transitada, tanto por residentes como por estudantes, o que agrava o perigo. “A falta de luz fai deste traxecto un percorrido inseguro”, sinalou.
A concelleira popular lembrou que en febreiro deste ano, os veciños fixeron pública esta situación, e o BNG comprometeuse a colocar dous puntos de luz de forma urxente, pero ata agora “nada se fixo”. Otero concluíu reclamando que estas demandas non caian en saco roto e insistiu na responsabilidade do goberno municipal de solucionar os problemas da veciñanza.
