A alcaldesa de Santiago de Compostela, Goretti Sanmartín, defendeu este sábado as políticas de conciliación, vivenda e a mellora dos servizos públicos como claves para que a capital galega siga gañando poboación. A rexedora sinalou que estes avances son “cuestións que non se fan dun día para outro, nin dun ano para outro”, apuntando que se trata de accións “a medio e longo prazo” que buscan consolidar o crecemento da cidade.
Sanmartín destacou que Santiago está a medrar e preto de alcanzar os 100.000 habitantes, o que cualificou de “bos resultados”, indicando que o obxectivo é conseguir que máis familias se instalen na cidade, así como fomentar o regreso de veciños que no pasado optaron por marchar a outras localidades.
Entre as principais medidas adoptadas polo executivo local está a creación dunha empresa municipal de vivenda e o impulso dun parque de vivendas de aluguer, co obxectivo de facilitar o acceso á vivenda e atraer novos residentes.
A alcaldesa fixo estas declaracións aos medios antes de participar na iniciativa ‘En Marcha contra o Cancro’, que comezou pasadas as 10:00 horas na Alameda compostelá, contando con máis de 800 persoas inscritas no evento.
