O pasado venres, a atleta olímpica e récord de España en lanzamento de peso, Belén Toimil, visitou os centros educativos CEIP da Barouta e CEP de Ventín no marco do programa Rural Athletics Girls, impulsado en Galicia pola Federación Galega de Atletismo. Durante a xornada, Toimil compartiu experiencias con máis de 200 alumnos e alumnas para promover a práctica do atletismo e destacar a importancia do deporte na educación.
A visita contou coa presenza do alcalde de Ames, Blas García, a concelleira de Deportes, Susana Señorís, e o presidente da Federación Galega de Atletismo, Iván Sanmartín. A concelleira destacou a relevancia da iniciativa, sinalando que “este tipo de actividades poden espertar o interese polo atletismo en máis rapaces e rapazas”.
No CEIP de Barouta, Toimil falou co alumnado de 5º e 6º de primaria sobre a súa preparación como atleta de alto nivel e sobre outras disciplinas do atletismo. Os estudantes participaron en actividades como carreira de obstáculos, lanzamento de xavelina e lanzamento de peso, guiados pola propia atleta.
A xornada continuou no campo de lanzamento de Ventín, onde Belén Toimil realizou exercicios de lanzamento e compartiu o seu coñecemento co alumnado do CEP de Ventín. O programa Rural Athletics Girls busca dinamizar a práctica do atletismo en todas as rexións do país, loitando contra a despoboación no medio rural a través do deporte.
