A Xunta de Galicia adiantou este luns a celebración do Día Europeo das Linguas cun acto institucional que tivo lugar nos soportais do Museo das Peregrinacións e de Santiago. O evento contou coa participación do secretario xeral da Lingua, Valentín García, e o alumnado do IES Arcebispo Xelmírez I, que protagonizou un recital multilingüe con poemas de autores europeos como Fernando Pessoa, Walt Whitman e Rosalía de Castro.
Valentín García destacou durante o acto a importancia de “ter unha lingua propia” e animou ao alumnado a valorar o aprendizaxe de idiomas como un medio para fortalecer a comprensión intercultural. “O coñecemento de linguas é unha ponte que une sociedades e culturas”, afirmou. Tamén resaltou a necesidade de visibilizar e promover o uso do galego no marco da diversidade lingüística europea.
O acto de hoxe precede á conmemoración oficial do Día Europeo das Linguas, que se celebra mañá, 26 de setembro. No portal da Lingua Galega, as persoas interesadas poderán consultar as actividades que os Equipos de Dinamización da Lingua Galega dos centros educativos galegos prepararon para esta efeméride.
O Día Europeo das Linguas, instaurado polo Consello de Europa en 2001, busca destacar a importancia de preservar a diversidade cultural e fomentar o entendemento lingüístico a través do aprendizaxe de idiomas. Mañá, o conselleiro de Cultura, José López Campos, representará a Galicia no acto oficial promovido polo Consello das Linguas Oficiais en Alacant.
