Compostela acollerá esta fin de semana o IV Festival dos Camiños, que se celebra baixo o lema “Os Camiños da Emigración”. O evento, impulsado pola Asociación Cultural-Musical de Antiguos Tunos Compostelanos e Amigos do Museo Casa de la Troya, co apoio da Secretaría Xeral de Emigración da Xunta, busca estreitar lazos culturais entre Galicia e América Latina, a través de agrupacións musicais de corda pulsada.
O festival contará coa participación da Tuna Lírica Patagónica ‘Abremiless’, procedente de Comodoro Rivadavia, Arxentina, integrada por máis de trinta músicos que interpretarán pezas tradicionais da Tuna e folclore hispanoamericano. Os anfitrións, Troyanos de Compostela, abrirán o evento o sábado, 28 de setembro, na igrexa de San Fernando ás 21:00 horas, nun concerto de entrada libre que incluirá unha recadación voluntaria a favor de Cáritas.
O programa tamén inclúe unha recepción aos músicos arxentinos o venres, cunha visita ao Museo Casa de la Troya e un roteiro polas rúas de Compostela, culminando cun encontro musical na Alameda.
Segundo o presidente da asociación organizadora, Benigno Amor, o festival é “unha oportunidade de unir culturas a través da música e lembrar o papel da emigración na identidade galega”.
