O Concello de Santiago e o colexio de arquitectos asinaron este martes o convenio para o concurso de ideas co que o goberno local aspira a transformar a contorna de Virxe da Cerca, o conector central da cidade.
O concelleiro de Urbanismo do Concello de Santiago, Iago Lestegás, rubricou este martes co decano do Colexio Oficial de Arquitectos de Galicia, Luciano G. Alfaya, e o presidente da Delegación de Santiago do Colexio Oficial de Arquitectos de Galicia, Anxo Cid Carballo, o acordo.
Este convenio de colaboración foi aprobado o luns na xunta de goberno local, tras a que o Concello presentou as bases do concurso de ideas para o proxecto de remodelación da contorna de Virxe da Cerca –Conector Central da cidade– co que o consistorio local pretende reducir o tráfico ao prohibir que os vehículos privados poidan atravesar a zona e gañar espazo para un dobre carril de transporte público/escolar, así como máis sitio para peóns e bicicletas.
Respecto diso, o Concello destacou este martes que o convenio permite ao Concello contar, no desenvolvemento das súas decisións, coa colaboración e achegue de coñecemento do COAG que, pola súa banda, colabora na definición dos criterios técnicos para a selección das propostas na primeira e segunda fase do concurso de ideas, e velará polos dereitos e deberes dos concursantes, difundindo a convocatoria, facilitando o acceso á documentación e formando parte do xurado en exercicio das súas competencias.
FASES DO CONCURSO
O Consistorio destacou que o concurso aspira a alcanzar o maior número de propostas e pretende avanzar cara a un novo modelo urbano que mellore a calidade de vida da xente.
Para iso, divídese en dúas fases, na primeira, o xurado seleccionará entre as candidaturas que ten que acreditar a solvencia técnica e económica e presentar unha proposta de actuación.
O resultado desta primeira fase será a sección de cinco equipos que desenvolverán a proposta a nivel de anteproxecto na segunda fase.
