A Consellería de Medio Ambiente e Cambio Climático, a través do seu organismo Augas de Galicia, eliminou recentemente dous puntos de verteduras de augas residuais localizados nos concellos de Trazo e Vedra. Estas incidencias foron detectadas polo Programa de Control de Verteduras (PCV), no marco das súas tarefas de seguimento da rede hidráulica.
No caso de Trazo, o persoal do PCV localizou a vertedura de augas pluviais que, mesturadas con augas residuais, procedían dunha vivenda particular. Segundo informou a Xunta, o titular da vivenda tomou as medidas necesarias para corrixir a situación.
En Vedra, a vertedura detectouse na parroquia de San Pedro de Sarandón, onde as augas residuais dun domicilio particular estaban a acabar nunha cuneta da estrada. Tras identificar o punto contaminante, o propietario actuou para solucionar o problema.
A actuación de Augas de Galicia en ambos casos garante unha mellora na calidade das augas na zona, reducindo o impacto ambiental e protexendo o entorno natural.
