O Concello de Santiago deu un paso importante esta semana coa creación da comisión negociadora para o seu primeiro plan de igualdade, dirixido a promover a equidade entre traballadores e traballadoras municipais. A comisión está presidida pola alcaldesa Goretti Sanmartín e conta coa vicepresidencia do concelleiro Manuel César Vila. Entre os vogais figuran a edil María Rozas Pérez e representantes de varios departamentos municipais, incluíndo Persoal, Igualdade, Servizos Sociais e Prevención de Riscos Laborais, así como membros do comité de empresa e da xunta de persoal.
Segundo indicou o Concello, este plan pretende “transformar a cultura interna” do organismo para garantir a igualdade entre homes e mulleres nas relacións laborais e na xestión dos recursos.
A fase inicial inclúe a recollida de datos mediante cuestionarios e entrevistas ao persoal municipal, o que permitirá analizar información cuantitativa e cualitativa para deseñar as medidas necesarias. Estas accións estarán acompañadas de indicadores de seguimento, un calendario de execución e a definición das áreas responsables para a súa implementación.
