A alcaldesa de Santiago, Goretti Sanmartín, confirmou que o proceso para asinar o convenio do parque comarcal de Bombeiros está “dentro do prazo pactado”, logo de que o alcalde de Ames, Blas García, remitise varios escritos solicitando fixar unha data inmediata para a súa sinatura. Sanmartín fixo estas declaracións xunto ao presidente da Deputación da Coruña, Valentín González Formoso, nun acto celebrado este xoves en Santiago de Compostela.
“O acordado era que chegando a outono teriamos ese texto para asinar. Está en procedemento para que poida pasar por todos os procedementos internos, pero estamos en prazo conforme ao que foi pactado”, explicou a rexedora compostelá, aludindo ao acordo entre os concellos e a Deputación.
Pola súa banda, González Formoso subliñou que a creación deste parque comarcal é un feito “único na historia de Galicia” debido á súa complexidade. “Non é fácil, houbo outros gobernos provinciais, autonómicos e locais que ou non tiveron a iniciativa ou non foron capaces de concretalo”, sinalou o presidente da Deputación, quen se amosou confiado en que o acordo se asinará “máis pronto que tarde”, xa que “a parte máis difícil está acordada”.
O parque comarcal de Bombeiros é un proxecto relevante para mellorar a seguridade e os servizos de emerxencias na comarca compostelá, e o acordo entre administracións supón un paso adiante para facelo realidade.
