O director de Turismo de Galicia, Xosé Merelles, destacou este mércores a aposta da Xunta por integrar tecnoloxías avanzadas para facer do Camiño de Santiago unha ruta máis sostible e adaptada aos novos tempos. Así o indicou durante a presentación do proxecto ‘Camiño Francés: Camiño 360º’, unha iniciativa promovida pola Mancomunidade de Municipios Galegos do Camiño Francés, que está en liña coa estratexia de dixitalización, innovación e sustentabilidade impulsada polo goberno autonómico.
Merelles agradeceu á Mancomunidade o seu esforzo por “manter a esencia do Camiño mentres avanzan cara un futuro máis dixital”. Tamén salientou que este proxecto se axusta aos obxectivos do Plan Director dos Camiños de Santiago 2027 e conta con fondos europeos Next Generation, cos que se busca mellorar as rutas xacobeas.
O proxecto ‘Camiño Francés: Camiño 360º’ inclúe a creación dunha cartografía dixital de todos os itinerarios do Camiño, que permitirá identificar e vectorizar os diferentes elementos territoriais. Ademais, desenvolverase unha aplicación que facilitará a xestión e mantemento das rutas e a creación de vídeos en formato 360º xeorreferenciados.
Merelles destacou que este proxecto “fai máis accesible o patrimonio cultural e natural do Camiño ao tempo que mellora a sustentabilidade da ruta”. Tamén engadiu que promove o uso de tecnoloxías innovadoras que axudan a desestacionalizar as visitas e mellorar a competitividade dos municipios ao longo do ano.
