O grupo de Oncoloxía Médica Traslacional (Oncomet), pertencente ao Instituto de Investigación Sanitaria de Santiago (IDIS), publicou un estudo na revista científica Molecular and Cellular Proteomics no que presentan un novo modelo capaz de predicir a resposta á inmunoterapia en pacientes con cancro de pulmón non microcítico metastásico.
Durante o proxecto, os investigadores centraron o seu traballo en analizar as proteínas diferenciais que posúen estes pacientes a través da plataforma SWATH-MS do IDIS, unha ferramenta que permite a análise masiva de proteínas no plasma. Grazas a esta tecnoloxía, o equipo foi quen de identificar 324 proteínas que varían entre pacientes que responden e os que non responden á inmunoterapia.
Segundo o IDIS, o biomarcador actual, a expresión do ligando de morte programada 1 (PD-L1), non é suficientemente eficaz para predicir a resposta ao tratamento. No entanto, os investigadores de Oncomet lograron desenvolver un modelo composto por sete proteínas que presenta un maior valor predictivo que o PD-L1 na cohorte de pacientes analizada.
“A análise de supervivencia mostrou que os baixos niveis de tres destas proteínas están asociados cunha maior supervivencia libre de progresión e unha supervivencia global máis prolongada“, destacou a investigadora Ana Belén Dávila. En cambio, baixos niveis doutra proteína predín unha peor supervivencia global.
No estudo tamén participaron Patricia Mondelo, Jorge García, Luís León Mateos, Alicia Abalo, Susana Bravo, María do Pilar Chantada, Laura Muinelo, Rafael López e Roberto Díaz, todos membros do grupo Oncomet do IDIS.
