O Concello de Boqueixón anunciou a organización de tres saídas ao Balneario Compostela, en Brión, dirixidas aos veciños e veciñas maiores de 60 anos que poidan valerse por si mesmos para realizar as actividades básicas da vida diaria. As datas programadas para estas actividades son os días 4 de outubro, 15 de novembro e 13 de decembro. Durante cada xornada, os participantes desfrutarán dun completo circuíto termal de dúas horas, no que poderán beneficiarse das propiedades da hidroterapia nun ambiente de relaxación e natureza.
A saída está programada para as 10:15 horas dende a Casa do Concello do Forte, e o circuíto termal, que se realizará nas instalacións do balneario de 11:00 a 13:00 horas, inclúe o acceso a dúas piscinas dinámicas con diversos elementos como chorros, contracorrentes, camas de auga e jacuzzi, ademais de saunas, baños turcos e espazos para a relaxación.
O custo para participar é de 15 euros por circuíto termal, que se aboarán no propio balneario, e 8 euros polo transporte en autobús, que se pagarán no momento da viaxe. Para inscribirse ou obter máis información, os interesados poden dirixirse ao Departamento de Servizos Sociais do concello ou chamar ao 981 513 106.
