O conselleiro de Educación, Ciencia, Universidades e Formación Profesional, Román Rodríguez, visitou hoxe o CEIP de Vite I en Santiago de Compostela para comprobar o resultado das obras de mellora da accesibilidade, que xa están finalizadas. Cun investimento de case 120.000 euros, a actuación permitiu instalar ramplas que melloran o acceso ás pistas exteriores e á zona verde do centro, facilitando a entrada desde a planta primeira do edificio.
Con esta mellora, a comunidade educativa, composta por máis de 200 persoas, disporá dun acceso máis cómodo e seguro. Rodríguez destacou que “a aposta da Xunta pola educación pública vai máis aló da formación académica, centrándose en crear espazos confortables, seguros e adaptados a todas as necesidades”. Estas actuacións enmárcanse no Plan de Nova Arquitectura 2021-2024, cun investimento de 278 millóns de euros para realizar 2700 obras en toda Galicia.
No caso de Santiago, o Plan inclúe a reforma e modernización de 13 centros cun investimento de máis de 5,5 millóns de euros. Ademais, durante o verán tamén se levaron a cabo obras dentro do Plan de Benestar e Accesibilidade na Escola (BEN_Estar 2024), con actuacións en 16 centros da capital compostelá por un valor de 370.000 euros, enfocadas en acadar maior confort e sustentabilidade nos espazos educativos.
