Nove galerías de arte da Coruña, Santiago de Compostela, Vigo e Ourense únense baixo o concepto ‘Aberto 24’ para dar comezo á nova tempada de exposicións. Organizado pola Asociación de Galerías de Arte Contemporánea de Galicia, o evento arranca o 19 de setembro con horarios especiais de apertura, e as mostras poderán ser visitadas nos horarios habituais a partir desa data.
En Santiago de Compostela, participan as galerías Trinta, Dupla e Luisa Pita. A Galería Trinta presentará a exposición ‘Amada’, da artista Juana González; en Dupla, será protagonista a obra da artista urbana Lula Goce; mentres que a galería Luisa Pita amosará ‘Alén do espello’, do escultor Fernando Suárez Reguera.
Na presentación da iniciativa, o director xeral de Cultura, Anxo M. Lorenzo, destacou o compromiso da Xunta de Galicia coa difusión da arte contemporánea, agradecendo a colaboración das galerías no impulso dos traballos de creadores galegos, tanto emerxentes como consagrados.
