O persoal mutualista da área de Compostela, formado maioritariamente por docentes, recibiu onte unha notificación de MUFACE informando de cambios na atención presencial na oficina de Santiago. A partir do luns, 16 de setembro, a oficina só estará operativa os luns e xoves laborais en horario de 9 a 14 horas. O resto da semana, as persoas usuarias deberán realizar as súas xestións a través da páxina web ou desprazarse á oficina da Coruña.
Ademais, no correo enviado por MUFACE explícase que, en caso de precisar receitas con visado, estas poderán ser enviadas por correo postal ao Servizo Provincial da Coruña, desde onde se devolverán do mesmo modo.
Desde o sindicato CIG-Ensino denuncian o que consideran un desmantelamento do servizo presencial de MUFACE en Santiago, un servizo que atende tanto a docentes en activo como a pensionistas, independentemente de que estes se acollan á prestación sanitaria pública do SERGAS ou a entidades privadas.
