O Servizo Galego de Saúde (Sergas) adxudicou por 12.043.950 euros, por un período de dous anos, o novo contrato de transporte sanitario da área de Santiago-Barbanza á unión temporal de empresas (UTE) TSNUX Santiago e Barbanza. Trátase da mesma UTE que levaba o servizo ata o momento e estaba conformada por Ambulancias Casablanca e Ambulancias do Cantábrico. Na primeira destas dúas estivo a piques de iniciarse un conflito a comezos de verán por varios incumprimentos de condicións laborais que denunciou a CIG, pero suspendeuse ao abrirse unha negociación.
O proceso de contratación iniciouse xa en abril, cando recibiu o visto e prace do Goberno galego aínda que por un prezo inicial duns 10 millóns. Con todo, foi declarado deserto porque non se presentaron ofertas, tras o que volveu saír a licitación a finais de xullo pero por 12 millóns máis. Así, o martes desta semana, o Portal Contratos do Sector Público da Xunta publicou a adxudicación do servizo á UTE TSNUX por outros dous anos.
