A CIG acusou á Consellería de Educación de transformar as xornadas de benvida a docentes en prácticas, celebradas esta semana na Cidade da Cultura, nun “acto político”. O sindicato nacionalista cuestiona que se obrigase ao profesorado que obtivo praza nas oposicións deste verán a asistir presencialmente, cando o resto da formación obrigatoria se realiza de forma telemática.
Nun comunicado emitido este venres, a CIG puxo o foco en que os actos dos días 4 e 5 de setembro, dirixidos a docentes de primaria e secundaria, formaban parte da axenda oficial do conselleiro Román Rodríguez e o seu equipo, algo que consideran inadecuado para un evento de carácter formativo.
Ademais, o sindicato denunciou que non se contempla o pago dos gastos de desprazamento para o profesorado que foi convocado a estas xornadas de asistencia obrigatoria, a pesar de que este persoal ten recoñecido o dereito a compensación económica nestes casos.
A CIG reclamou a modificación ou eliminación destas xornadas ou, no seu defecto, que se organicen con carácter comarcal para evitar desprazamentos longos. Tamén pediu que se exclúan intervencións políticas, como a presenza da directora xeral de FP na xornada de Infantil e Primaria, ao considerar que non tiña relevancia no contexto.
Finalmente, o sindicato esixe que a Consellería abone o gasto de quilometraxe ao profesorado que asistiu aos actos desta semana.
