Este sábado, 7 de setembro, a Xunta de Galicia organiza o seu tradicional desfile de entroidos en Santiago de Compostela, unha acción enmarcada na estratexia de desestacionalización turística que busca promocionar as festas de entroido galegas e atraer visitantes no inverno. O desfile, impulsado por Turismo de Galicia, sairá da Praza do Obradoiro ás 12:45 horas e percorrerá varias rúas do centro histórico compostelán, como a rúa de Fonseca, o Preguntoiro e a Praza de Cervantes, para rematar de novo no Obradoiro.
O evento contará coa participación de máis de 400 persoas que representan 14 entroidos tradicionais de Galicia, entre os que destacan catro festas declaradas de Interese Turístico: os entroidos de Vilaboa, Verín, Viana do Bolo e os Xenerais da Ulla. Tamén estarán presentes outras celebracións emblemáticas como os Volantes de Chantada, as Bonitas de Sande ou os Vellaróns de Riós.
As actividades comezarán ás 10:30 horas na Praza do Obradoiro con actuacións musicais de DJ Mil e a Banda do Beat, que combinarán música tradicional galega con novos sons da World Music, creando unha atmosfera festiva antes do comezo do desfile.
Esta iniciativa promocional busca que tanto galegos como visitantes coñezan de primeira man a riqueza do patrimonio cultural dos entroidos galegos, incentivando así a súa participación nas celebracións de Entroido durante o inverno.
